تغيير صورة البروفايل باستمرار: هل هو مجرد تجديد أم علامة على نقص داخلي؟

بزمن الهويّة صارت رقمية ومرتبطة بكل تفاصيل حياتنا صارت صورة البروفايل مو بس صورة صارت تمثل شلون نحب نكون أو شلون نتمنى الناس يشوفونا. بس من يصير تغيير الصورة عادة متكررة ، لازم نسأل نفسنا: هو حب للتغيير؟ لو هو محاولات متكررة نغطي بيها شي ناقص نحس بيه من جوه؟

كثير مرات نشوف اللي يغير صورته بكل مناسبة وكل مرة يحاول يطلع بأفضل شكل ممكن يمكن هو ما مرتاح ويه نفسه كفاية. الشخص اللي واصل مرحلة رضا عن ذاته،د غالبًا ما يحتاج يغيّر صورته كل شوي لأن هو مرتاح لشخصه وما منتظر تقييم من غيره. بس اللي كل يوم صورة وكل يوم ستايل يمكن دا يدور على قبول أو نظرة من أحد تعوّضه عن إحساس فراغ داخلي.

هالسلوك بحد ذاته مو غلط بس وراه شي يستحق نوقف ونتأمل بيه. ليش صورتي القديمة ما تكفي؟ ليش كل مرة أريد أطلع أحسن؟ الجواب غالبًا يكون لأنّا ما نحس نفسنا كافين مثل ما إحنا.

الاعتراف بهالشي مو ضعف بالعكس هو بداية الوعي. والوعي هو أول خطوة باتجاه ثقة حقيقية ثقة ما تحتاج صورة جديدة كل يوم حتى تبرر وجودك بيها.